Prezident İlham Əliyevin Sərəncamı ilə “Azərbaycan Respublikasında biznes mühitinin əlverişliliyinin artırılması və beynəlxalq reytinqlərdə ölkəmizin mövqeyinin daha da yaxşılaşdırılması ilə bağlı əlavə tədbirlər haqqında” Azərbaycan Respublikası Prezidentinin Sərəncamının həyata keçirilməsinə dair Tədbirlər Planı təsdiq edilib. Tədbirlər planı biznes mühitinin əlverişliliyinin artırılması və beynəlxalq reytinqlərdə ölkəmizin mövqeyinin daha da yaxşılaşdırılması ilə bağlı komissiyanın fəaliyyətinin əsas tərkib hissəsidir. İqtisadi İslahatların Təhlili və Kommunikasiya Mərkəzinin analitiki Nicat Hacızadə Tədbirlər planın mahiyyətini şərh edərək bildirib ki, bu Sərəncam ölkəmizin biznes mühitinin inkişafı və beynəlxalq reytinqlərdə ölkəmizin mövqeyinin daha da yaxşılaşdırılmasını təmin edəcək. “Belə ki, tədbirlər planı aparıcı beynəlxalq hesabatların metodologiyaları və indikatorları çərçivəsində nəzəri-praktiki islahat proqramını özündə ehtiva edərək, ölkənin biznes mühitinin əlverişliyinin daha da yaxşılaşdırılması istiqamətində əhəmiyyətli rol oynayacaq. Həmçinin, vurğulamaq lazımdır ki, Tədbirlər planında Milli İqtisadiyyat və iqtisadiyyatın  əsas sektorları üzrə Strateji Yol xəritəsində də nəzərdə tutulan prioritetlər qeyd edilib.”

   Nicat Hacızadə Tədbirlər Planının həmçinin ölkənin makroiqtisadi stabilliyinin daha da möhkəmlənməsinə  töhfə verəcəyini qeyd edib: “Bildiyiniz kimi, tədbirlər planında beynəlxalq ictimaiyyətin önəm verdiyi hesabatlar da qeyd olunub. Azərbaycan Respublikası Prezidentinin mütəmadi olaraq vurğuladığı “Doing Business” və Qlobal Rəqabətlilik” hesabatları da fəaliyyət planın tərkibində yer alıb. Qlobal Rəqabətlilik hesabatı tərkibində yetərincə əsas və alt indikatorlar  var ki, həmin indikatorlar üzrə mövqelərin daha da  yaxşılaşdırılması istiqamətində tədbirlər və tədbirlərin icraçıları müəyyən olunub. İndikatorlar arasında mahiyyət etibarı ilə makroiqtisadi göstəricilərə də yer verilib ki, bu istiqamətdə artıq Cənab Prezidentin tapşırığı ilə islahat tədbirləri aparılır. Bundan əlavə, fiziki infrastruktur, insan kapitalı, səhiyyə, texnologiya və innovasiya kimi bölümlərdə tədbirlər planında qeyd olunub ki, bütün bunlar ölkə iqtisadiyyatına dolayı töhfə verəcək sahələrdir.