İqtisadi İslahatların Təhlili və Kommunikasiya Mərkəzinin (İİTKM) icraçı direktoru, professor Vüsal Qasımlı Türk Ticarət və Sənaye Palataları Birliyinin Baş Katibi Adem Kula, Azərbaycan Sahibkarlar Konfederasiyasının (ASK) vitse-prezidenti Vüqar Zeynalov və  müşaviri Ziya Hacılını qəbul edib.

V.Qasımlı görüşdə Türk Dövlətləri Təşkilatının (TDT) qurulmasından bəri İİTKM-in bu təşkilatla fəal və məhsuldar əməkdaşlıq apardığını və bu məqsədlə Mərkəzin nəzdində Türk Dünyası Araşdırmalar Mərkəzinin yaradıldığını qeyd edib. O,  İİTKM-in TDT Katibliyi ilə birlikdə həyata keçirdiyi layihələr, xüsusilə yeddi türk dövlətinin iqtisadi tədqiqatlar sahəsində tanınmış 35-dən artıq aliminin iştirakı ilə hazırlanan “Türk Dövlətləri İqtisadiyyatı” kitabı,  ildə dörd dəfə səkkiz dildə nəşr olunan “Türk iqtisadi icmalı” və hazırda hazırlıq prosesində olan “Türk Dövlətlərinin interaktiv geoiqtisadi xəritəsi” barədə ətraflı məlumat verib.

Vüsal Qasımlı ASK-ın 2025-ci ildə Türk Ticarət və Sənaye Palataları Birliyinə sədrliyi dövründə “Türk Dövlətlərinin interaktiv geoiqtisadi xəritəsi”nin hazırlanması, “Sahibkarlıq və startapları dəstəkləmək üçün biznes əməkdaşlığı” və “E-ticarət imkanlarının artırılması” layihələri üzrə birgə əməkdaşlığın həyata keçirilməsində İİTKM-in maraqlı olduğunu bildirib. O, bu layihələrin TDT ölkələri arasında ticarət və investisiya imkanlarının artırılmasında dataəsaslı qərarların qəbul edilməsi baxımından əhəmiyyətini qonaqların diqqətinə çatdırıb.

Türk Ticarət və Sənaye Palataları Birliyinin Baş Katibi Adem Kula Türk dünyasında ticarət əlaqələrinin gücləndirilməsi və qarşılıqlı investisiyaların artırılmasına dəstək verən layihələrin icrası istiqamətində İİTKM ilə əməkdaşlıqda maraqlı olduqlarını ifadə edib. O, TDT-yə üzv dövlətlər arasında logistika, nəqliyyat, bankçılıq, kənd təsərrüfatı və turizm sahəsində əməkdaşlığın əhəmiyyətini vurğulayıb, ticarət, investisiya və iqtisadi məlumatları bir araya gətirən platformanın yaradılması kimi layihələrin investorların daha yaxşı qərarlar qəbul etməsinə dəstək verəcəyinə əminliyini bildirib.

ASK-ın vitse-prezidenti Vüqar Zeynalov iqtisadi inkişafı sürətləndirmək üçün prioritet sahələrdə birgə təşəbbüslərin həyata keçirilməsinin, xüsusilə də rəqəmsal platformaların hazırlanıb istifadəyə verilməsinin əhəmiyyətini qeyd edib. Eyni zamanda belə layihələrin regionda investisiya axınının artırılmasına, güclü tərəfdaşlıqların qurulmasına və sahibkarlıq bacarıqlarının inkişafına töhfə verəcəyini bildirib.

Tədbirdə İİTKM-in “Azexport” portalının rəhbəri Ayxan Qədəşov və Strateji planlaşdırma şöbəsinin baş məsləhətçisi Aygün Əhmədova müzakirə olunan layihələr barədə qonaqlara ətraflı təqdimatlar ediblər.

Sonda Vüsal Qasımlı qonaqlara İİTKM tərəfindən hazırlanmış “Türk Dövlətləri İqtisadiyyatı” kitabı və  “Türk iqtisadi icmalı”nı  təqdim edib.