Azərbaycan Dövlət İqtisad Universitetində (UNEC) İqtisadi İslahatların Təhlili və Kommunikasiya Mərkəzinin operatoru olduğu "Enterprise Azerbaijan" portalının təşkilatçılığı ilə “Startup School 3” layihəsinin növbəti infosessiyası keçirilib.

Tədbirdə UNEC-in tələbələri, startap sahəsinə maraq göstərən gənclər və innovativ təşəbbüskarlar iştirak ediblər. İnfosessiyanın məqsədi layihə barədə ətraflı məlumat vermək, iştirak imkanlarını izah etmək və innovasiya sahəsində bilik və bacarıqların inkişafına dəstək göstərmək olub.

Tədbirdə çıxış edən "Enterprise Azerbaijan" portalının rəhbəri İsa Qasımov layihə çərçivəsində həyata keçirilən “Yaşıl və Rəqəmsal İpək Yolu” (Green and Digital Silk Road) beynəlxalq akselerasiya proqramı barədə məlumat verib. O qeyd edib ki, proqram yaşıl və rəqəmsal sahələrdə fəaliyyət göstərən startapların inkişafını dəstəkləmək, innovasiya ekosisteminin genişlənməsinə, regional əməkdaşlığın güclənməsinə və investisiya imkanlarının artırılmasına xidmət edir.

İnteraktiv şəkildə keçirilən infosessiyada iştirakçılar proqramın mərhələləri, seçim meyarları, təlim və mentorluq imkanları, eləcə də yerli və beynəlxalq tərəfdaşlıq perspektivləri haqqında ətraflı məlumat əldə ediblər. Sessiya çərçivəsində iştirakçıların sualları cavablandırılıb və startap inkişafı ilə bağlı praktiki məsləhətlər təqdim olunub.

Qeyd edək ki, “Startup School 3” layihəsi yerli və beynəlxalq innovasiya təşəbbüsləri ilə inteqrasiya olunmaqla həyata keçirilir və ölkədə startap ekosisteminin inkişafına töhfə verməyi, gənc təşəbbüskarların potensialını üzə çıxarmağı və onların qlobal bazarlara çıxış imkanlarını genişləndirməyi hədəfləyir.