İqtisadi İslahatların Təhlili və Kommunikasiya Mərkəzinin operatoru olduğu “Enterprise Azerbaijan” portalının Almaniyanın Süni İntellekt Araşdırma Mərkəzi (Deutsches Zentrum für Künstliche Intelligenzforschung - DFKI) və ABŞ-ın Nevada Universitetinin Özmən Sahibkarlıq Mərkəzi ilə birgə həyata keçirdiyi “Startup School 2 - AI for Green Solidarity” (Yaşıl həmrəylik naminə süni intellekt) layihəsinin təlimləri davam edir.

Növbəti təlim “Əşyaların interneti (IoT) və sənaye 4.0-ın yenidən formalaşdırılmasında süni intellektin rolu”na (AI's role in reshaping both the Internet of Things (IoT) and Industry 4.0.) həsr olunub. DFKI-nin professoru Dr. Andreas Emrixin keçirdiyi təlim sessiyasında iştirakçılara süni intellektin təkamülünün hərtərəfli icmalı təqdim olunub, onun müxtəlif sənaye sahələrində innovasiyaları idarə etməkdə inqilabi potensialı izah edilib.

A.Emrix, həmçinin “iprodict” və “smartlego” kimi DFKI tərəfindən idarə olunan layihələri nümayiş etdirərək sənaye 4.0-ın transformasiya potensialına aydınlıq gətirib. Bildirib ki, bu nümunələr sənaye proseslərini optimallaşdırmaq və məhsuldarlığı artırmaq üçün süni intellektin praktik tətbiqləri haqqında təsəvvür yaradıb. Bundan əlavə, A.Emrix qeyri-müəyyən mühitlərdə effektiv şəkildə hərəkət edə bilən süni intellekt sistemlərinin dizaynına dair təkliflər irəli sürərək, “qapalı dünya” və “açıq dünya” fenomenlərinin ziddiyyətli paradiqmalarını izah edib. O, nəzəri konsepsiyaları real dünya nümunələri ilə birləşdirərək, ağıllı istehsal (smart production) prosesində innovasiyaları təşviq etməkdə süni intellektin rolundan danışıb.

Sonda mövzu ilə əlaqədar startapçılara xüsusi tapşırıqlar verilib.