İqtisadi İslahatların Təhlili və Kommunikasiya Mərkəzinin (İİTKM) Monitorinq və qiymətləndirmə şöbəsinin aparıcı məsləhətçisi Samir Rəhimov Çin Xalq Respublikasında keçirilən “Bir kəmər, bir yol” ölkələri üçün ağıllı monitorinq texnologiyaları və məhsulların idarə edilməsi” adlı beynəlxalq seminarda iştirak edib.

Proqramın əsas məqsədi "Bir kəmər, bir yol" təşəbbüsünə qoşulan ölkələrin nümayəndələrinin texnologiya sahəsində bilik və bacarıqlarının artırılması, Çin təcrübəsinin öyrənilməsi və beynəlxalq əməkdaşlığın gücləndirilməsi olub.

Çin Xalq Respublikasının Ticarət Nazirliyinin dəstəyi və Şenzen Beynəlxalq İqtisadi və Texnoloji Əməkdaşlığın Təşviqi Assosiasiyasının təşkilatçılığı ilə keçirilən tədbir çərçivəsində iştirakçılar Çinin rəqəmsal inkişaf strategiyası, süni intellekt əsasında işləyən təhlükəsizlik sistemləri, ağıllı şəhər həlləri, videoanalitika, rəqəmsal idarəetmə platformaları və IoT (əşyaların interneti) texnologiyalarının real tətbiqi mövzuları üzrə mühazirələr dinləyib, həmçinin qabaqcıl texnologiya şirkətlərinə, müəssisələrə və bir çox innovasiya mərkəzlərinə səfərlərdə iştirak ediblər.

Samir Rəhimov bağlanış mərasimində Azərbaycan nümayəndə heyəti adından çıxış edərək seminar çərçivəsində əldə olunan bilik və təcrübənin əhəmiyyətini, ölkələrimiz arasında texnologiya, innovasiya və ağıllı idarəetmə sahələrində əməkdaşlığın inkişaf perspektivlərini vurğulayıb.

Qeyd edək ki, beynəlxalq proqramda İİTKM-lə yanaşı, Azərbaycan Respublikasının Energetika Nazirliyi, Ekologiya və Təbii Sərvətlər Nazirliyi, Kiçik və Orta Biznesin İnkişafı Agentliyi və “Tibbi Ərazi Bölmələrini İdarəetmə Birliyi” publik hüquqi şəxsin nümayəndələri də iştirak ediblər.