İqtisadi İslahatların Təhlili və Kommunikasiya Mərkəzində (İİTKM) Türk Dövlətləri Təşkilatına (TDT) üzv ölkələrin qeyri-hökumət təşkilatlarının (QHT) Platformasının baş katibi, millət vəkili Azər Allahverənovla görüş keçirilib.

Görüşdə İİTKM-in nəzdində fəaliyyət göstərən Türk Dünyası Araşdırmalar Mərkəzinin (TDAM) rəhbəri İlyas Hüseynov Türk dövlətləri arasında iqtisadi əlaqələrin dərinləşdirilməsi və ortaq strateji yanaşmaların təşviqi istiqamətində aparılan fəaliyyət barədə məlumat verib. O, TDAM-ın TDT ilə birgə 8 dildə rüblük dərc etdiyi “Türk iqtisadi icmalı” haqqında, həmçinin çapa hazırlanan “Türk Dövlətləri: Yüksələn İnvestisiya Gücləri” kitabı və “Türk Dövlətlərinin Rəqəmsal İqtisadiyyatı: Qlobal Trendlər və Regional Reallıqlar” kitabı  layihələri barədə danışıb.

Görüşdə “Davamlı məsləhətləşmələr və birgə tədqiqatlar vasitəsilə Türk Dövlətləri Təşkilatı daxilində iqtisadi əməkdaşlığın gücləndirilməsi” mövzusunda Bakıda keçirilməsi planlaşdırılan TDT-nin aparıcı milli analitik mərkəzlərinin 2-ci Konfransı haqqında fikir mübadiləsi aparılıb.

Azər Allahverənov bildirib ki, Türk dünyasında iqtisadi, elmi, ictimai və humanitar əməkdaşlığın geniş perspektivləri mövcuddur, TDT çərçivəsində qeyri-hökumət təşkilatları arasında əlaqələrin genişləndirilməsi üçün ortaq analitik və tədqiqat platformalarının formalaşdırılması mümkündür.

Görüşdə Türk dövlətləri arasında institusional əməkdaşlığın gücləndirilməsi, ortaq iqtisadi gündəliyin təşviqi, eləcə də regional inteqrasiya proseslərinin elmi-analitik baxımdan dəstəklənməsinin əhəmiyyəti vurğulanıb. TDT-yə üzv ölkələrin analitik mərkəzləri, vətəndaş cəmiyyəti institutları və akademik çevrələri arasında əməkdaşlığın genişləndirilməsi, birgə konfransların, tədqiqat proqramlarının və ekspert platformalarının təşkili imkanları ətrafında fikir mübadiləsi aparılıb.

Sonda qonağa “Türk Dövlətləri İqtisadiyyatı” kitabı təqdim olunub.