İqtisadi İslahatların Təhlili və Kommunikasiya Mərkəzinin operatoru olduğu “Azexport” portalı ilə ölkəmizdə balıq və dəniz məhsulları sənayesində ixtisaslaşan “Azproduct” MMC nümayəndələri arasında görüş keçirilib.

Görüşdə Azərbaycanın balıqçılıq sənayesinin ixrac potensialının reallaşdırılması, yerli məhsulların qlobal bazarlara çıxışı zamanı qarşıya çıxan texniki baryerlərin aradan qaldırılması yolları və sektorun strateji inkişaf istiqamətləri üzrə müzakirələr aparılıb.

Müzakirələr zamanı “Azexport” portalına xarici ölkələrdən balıq və konservləşdirilmiş dəniz məhsulları üzrə daxil olan ixrac sifarişlərinin dinamikası təhlil edilib. Qlobal bazarlarda bu kateqoriyadan olan məhsullara marağın artması ilə yanaşı, ixrac zamanı beynəlxalq keyfiyyət normaları və sertifikatlaşdırma tələblərinin sərtləşməsi vurğulanıb.

Görüş çərçivəsində xarici bazarlara çıxış üçün zəruri olan beynəlxalq sanitar-gigiyenik normaların, müasir qablaşdırma standartlarının və məhsulun izlənilməsi sistemlərinin tətbiqi məsələlərinə xüsusi diqqət yetirilib. Bununla yanaşı, balıq məhsullarının daşınması zamanı “soyuq zəncir” rejiminə riayət olunması, beynəlxalq logistikada mövcud çağırışlar və onların optimal həll yolları, eləcə də ölkə daxilində akvakulturanın inkişaf etdirilməsi və emal sənayesində müasir texnologiyaların tətbiqi vasitəsilə yerli istehsalın rəqabətqabiliyyətliliyinin artırılması ətrafında geniş fikir mübadiləsi aparılıb.

Neftçala Sənaye Məhəlləsinin rezidenti olan “Azproduct” MMC-nin nümayəndələri öz növbəsində istehsal prosesində beynəlxalq qida təhlükəsizliyi standartlarının adaptasiyası və ixraca hazırlıq təcrübəsini bölüşüblər. Qeyd olunub ki, müəssisənin istehsal infrastrukturunun müasir tələblərə uyğunlaşdırılması yerli məhsulların xarici bazarlarda mövqeyinin gücləndirilməsi baxımından mühüm əhəmiyyət kəsb edir. Həmçinin şirkətin “Dalğa” brendi ilə daxili bazarda və “HORECA” sektorunda əldə etdiyi nəticələr yerli brendlərin xarici bazarlarda effektiv təmsil olunma strategiyaları baxımından müzakirə predmeti olub.

Görüşün yekununda balıqçılıq sənayesində ixrac coğrafiyasının genişləndirilməsi və daxil olan sorğuların operativ emalı istiqamətində birgə əməkdaşlığın gücləndirilməsi qərara alınıb.