İqtisadi İslahatların Təhlili və Kommunikasiya Mərkəzində (İİTKM) “Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı”nın icrasının monitorinqi və hesabatlılığının təşkili ilə bağlı yerli icra hakimiyyəti orqanlarının nümayəndələri üçün növbəti təlim keçirilib.

Təlimdə Gəncə, Naftalan və Yevlax şəhər icra hakimiyyəti, eləcə də Ağstafa, Daşkəsən, Gədəbəy, Goranboy, Göygöl, Qazax, Samux, Şəmkir, Tovuz və Ağdaş rayon icra hakimiyyətlərinin məsul əməkdaşları iştirak ediblər.

İİTKM-in icraçı direktorunun müavini Təranə Salıfova çıxışında bildirib ki, rəqəmsal həllərin tətbiqi hesabatlılıq prosesinin daha operativ və səmərəli təşkilinə imkan yaradır. T.Salıfova təlimlərin məqsədinin yerli icra hakimiyyəti orqanlarının Fəaliyyət Planı üzrə öhdəliklərinin icrasına dair hesabatların hazırlanması və "e-monitorinq" portalı vasitəsilə təqdim olunması mexanizmi barədə iştirakçıların praktiki biliklərini artırmaq olduğunu vurğulayıb.

İİTKM-in icraçı direktorunun müşaviri Bağış Əhmədov Fəaliyyət Planında yerli icra hakimiyyəti orqanları tərəfindən icrası nəzərdə tutulan tədbirlər, onların həyata keçirilməsi üçün Yol Xəritələrinin hazırlanması və indikativ planlaşdırmanın tətbiqi barədə təqdimatla çıxış edib. Təqdimat zamanı tədbirlərin icrasında koordinasiyanın və planlaşdırmanın əhəmiyyəti xüsusi vurğulanıb.

İİTKM-in şöbə müdiri İsmət Mehrəliyeva təlim iştirakçılarına e-monitorinq portalında hesabatların yaradılması, məlumatların daxil edilməsi, təsdiqlənməsi və təqdim olunması mərhələləri əyani şəkildə izah edilib, portalın tətbiqi zamanı diqqət yetirilməli məqamlar barədə ətraflı məlumat verilib.

Görüşün müzakirə hissəsində iştirakçıları maraqlandıran məsələlər ətrafında fikir mübadiləsi aparılıb. Yerli icra hakimiyyəti orqanlarının nümayəndələrinin sualları Rəqəmsal İnkişaf və Nəqliyyat Nazirliyinin və İİTKM-in əməkdaşları tərəfindən cavablandırılıb, hesabatlılıq prosesində vahid yanaşmanın təmin olunması ilə bağlı müzakirələr aparılıb.