Azərbaycan Respublikası İqtisadi İslahatların Təhlili və Kommunikasiya Mərkəzinin (İİTKM) icraçı direktoru, iqtisad elmləri doktoru Vüsal Qasımlı İngiltərənin Newcastle Universiteti ilə birgə həyata keçirilən “Creative Spark” (Yaradıcı Qığılcım) layihəsinin “Big İDEA” adlı ideya və fikir yarışının ilkin mərhələsində iştirak şansı qazanan startapçılarla görüşüb. Vüsal Qasımlı bildirib ki, son dövrlər aparılan islahat tədbirləri nəticəsində startap ekosistemi inkişaf etdirilir. Onun sözlərinə görə, Vergi Məcəlləsinə dəyişikliyə əsasən Azərbaycanda mikro və kiçik sahibkarlıq subyekti olan və hüquqi şəxs kimi fəaliyyət göstərən startaplar “Startap” şəhadətnaməsi aldığı tarixdən 3 il müddətinə vergidən azad olunur. Bundan başqa mikro sahibkarlıq subyekti olan hüquqi şəxslərin sahibkarlıq fəaliyyətindən əldə etdikləri mənfəətin 75 faizi vergidən azad olunanlar siyahısına əlavə olunur. Həmçinin KOB klaster şirkətinin mənfəəti - KOB klaster şirkətlərinin reyestrinə daxil edildiyi tarixdən 7 il müddətinə vergidən azad edilir. ƏDV-nin məqsədləri üçün qeydiyyata alınmayan və əməliyyatlarının həcmi ardıcıl 12 aylıq dövrün istənilən ayında 200.000 manatadək olan rezident müəssisənin təsisçisi və ya səhmdarları mənfəət vergisindən azad edilir.

İcraçı direktor Azərbaycanda startapların toxum, mələk və vençur investorlara çıxışına dəstək vermək üçün yaradılan EnterpriseAzerbaijan.com portalının fəaliyyətini misal göstərib. Əlavə edib ki, ölkədə startap ekosisteminin tərkib hissəsi kimi sənaye parkları, sənaye məhəllələri, aqro və texno parklar fəaliyyət göstərir. Çox sayda biznes inkubatorları yaradılıb.

Vüsal Qasımlı bildirib ki, İngiltərənin Newcastle Universiteti ilə həyata keçirilən “Creative Spark” (Yaradıcı Qığılcım) layihəsinin əsas məqsədi Azərbaycan startaplarının beynəlxalq səviyyədə tanınmasına dəstək göstərməkdən ibarətdir.

Qeyd edək ki, ümumilikdə müsabiqəyə 50-dən artıq layihə təqdim olunub və onlardan bir qismi “İdeation” və “Boot Camp”-a qatılmaq şansı qazanıblar. Britaniya Şurasının (British Council) təşəbbüsü ilə tələbə və gənc startapçılar arasında həyata keçirilən yarışmanın qaliblərini öz ideyalarını həyata keçirmək üçün £25.000-ə qədər pul mükafatı, Birləşmiş Krallığa səfərlər və professional biznes dəstəyi gözləyir. Müsabiqədə İİTKM-in EnterpriseAzerbaijan.com portalına layihə daxil edən startapçılar, Azərbaycan Dövlət İqtisad Universiteti, Bakı Mühəndislik Universiteti və Azərbaycan Dövlət Aqrar Universitetinin tələbələri iştirak edir.