İqtisadi İslahatların Təhlili və Kommunikasiya Mərkəzində İtaliya-Azərbaycan Ticarət Palatasının prezidenti xanım Manuela Traldi ilə görüş keçirilib.

Görüşdə İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı Azərbaycan və İtaliya arasında qarşılıqlı iqtisadi və biznes əlaqələrinin yüksək səviyyədə inkişafından məmnunluğunu bildirib, eləcə də investisiyaların cəlb olunması və sahibkarlığın inkişafına dəstək, iki ölkənin iş adamları arasında etibarlı ticarət əlaqələrinin daha da inkişaf etdirilməsində Mərkəzin operator olduğu https://azexport.az/ və https://enterpriseazerbaijan.gov.az/ və https://dth.az/ rəqəmsal ticarət portallarının potensialından istifadənin əhəmiyyətini vurğulayıb.  

Xanım Manuela Traldi İtaliya-Azərbaycan Ticarət Palatasının iki ölkə arasında iqtisadi və ticarət əlaqələrinin inkişafı və tərəflər arasında əməkdaşlıq və dostluq əlaqələrin möhkəmləndirilməsi istiqamətində fəaliyyəti barədə məlumat verib.  O bildirib ki, Palata daimi olaraq ticarət missiyaları, ölkələr arasında biznes forumları, seminarlar və digər işgüzar görüşlər təşkil edir. Eyni zamanda yüksək səviyyəli yerli və xarici ekspertlərin dəstəyi ilə şirkətlərin xarici bazarlara daxil olması üçün fərdi layihələr hazırlayırlar. M.Traldi Azərbaycanın iqtisadi potensialının Avropa ölkələrində tanıdılması üzrə məqsədyönlü fəaliyyətin aparıldığını qeyd edib.

Görüşdə Avropa İttifaqı tərəfindən hazırlanan “Azərbaycan Biznes Mühiti Hesabatı 2021” sənədi müzakirə olunub və sahibkarlığın inkişafına dəstək mexanizmləri və bu istiqamətdə həyata keçirilən iqtisadi islahatlar barədə qonağa ətraflı məlumat verilib.

Sonda qonağa Mərkəzdə fəaliyyət göstərən “Bir Pəncərə” İxraca Dəstək Mərkəzi barədə təqdimat edilib.