Görüşdə Vüsal Qasımlı ölkədə biznes və investisiya mühitinin yaxşılaşdırılması məqsədilə “Azərbaycan 2020 Strateji Yol Xəritəsinin” tərtibi və icrasının monitorinq edilməsində Mərkəzin fəaliyyəti və Azərbaycan məhsullarının xarici bazarlara çıxışını asanlaşdıran https://azexport.az/, rəqəmsal ticarət platforması olan https://dth.az/ və kiçik və orta sahibkarlar, startup və investorlara xidmət edən http://enterpriseazerbaijan.gov.az/ kimi Mərkəzin operator olduğu e-portallar barədə məlumat verib.

Eyni zamanda, Strateji Yol Xəritələrində qarşıya qoyulmuş hədəflərə nail olunduğunu, belə ki, ildə ən azı 3%  ümumi daxili məhsul artımının təmin edildiyini və Azərbaycanın Dünya Bankı tərəfindən dünyanın ən islahatçı ölkələrindən biri kimi “Doing Business” reytinqində yüksək nəticə göstərdiyini qonağın diqqətinə çatdırıb və ölkənin beynəlxalq reytinqlərdə mövqeyinin yaxşılaşdırılması üzrə “Biznes Mühiti və Beynəlxalq Reytinqlər üzrə Komissiyasının” (https://azranking.az/) fəaliyyəti barədə ətraflı məlumat verib.

V.Qasımlı USACC-ın Azərbaycanın Birləşmiş Ştatlarla ticarətin genişləndirilməsi və Azərbaycana investisiya qoyuluşunun stimullaşdırılması istiqamətində əhəmiyyətli imkanlara və şəbəkə potensialına malik olduğunu qeyd edib.

Azərbaycan Ticarət Palatasının (USACC) icraçı direktoru Natiq Baxışov bildirib ki, 1995-ci ildə yarandığı gündən ABŞ - Azərbaycan Ticarət Palatası Azərbaycanla uzunmüddətli işgüzar əlaqələr qurmaq istəyən Amerika şirkətləri üçün mühüm resurs oynamaqla, 500-ə yaxın üzv şirkəti və iqtisadiyyatın bütün sektorlarından olan müxtəlif biznes qruplarını təmsil edir. USACC iki ölkə arasında işgüzar və ticarət əlaqələrinin təkmilləşdirilməsi üçün əsas körpü olmaqla kənd təsərrüfatı, tikinti, informasiya texnologiyaları, alternativ enerji və turizm kimi digər sektorlara investisiyaların təşviqini həyata keçirir. Eyni zamanda,  Azərbaycan və ABŞ arasında ikitərəfli iqtisadi əlaqələri və layihələri təşviq etməklə yanaşı, Azərbaycan Ticarət və Mədəniyyət Mərkəzi vasitəsilə ABŞ-da Azərbaycan haqqında daha geniş məlumat yayır və Azərbaycanın ümumi inkişafına təsir edə biləcək qeyri-kommersiya xarakterli layihələri müəyyən edərək həyata keçirir.

Sonda qonaq Mərkəzdə fəaliyyət göstərən “Bir Pəncərə” İxraca Dəstək Mərkəzi ilə tanış olub.