İqtisadi İslahatların Təhlili və Kommunikasiya Mərkəzinin Strateji təhlil və planlaşdırma meneceri Vüsalə Cəfərova İqtisadi Əməkdaşlıq və İnkişaf Təşkilatının (OECD) Parisdə Şərq Tərəfdaşlığı Ölkələrinin iştirakı ilə keçirilən “Avropada Kiçik Biznes Aktının Qiymətləndirmə Hesabatı-2020” regional tədbirində Azərbaycanı təmsil edib.

  Vüsalə Cəfərova, tədbirdə  “Kiçik Biznes Aktının” 10 prinsipi üzrə keçirilən sessiyalarda Azərbaycanda həyata keçirilən islahatlar, biznes mühitinin əlverişliliyinin artırılması üzrə hədəf indikatorları, strateji prioritetlər və görülən işlərin monitorinqinin nəticələri barədə çıxış edib. O, Azərbaycanın “Doing Business” hesabatında dünyada “ən islahatçı” ölkə statusunu qazanması təcrübəsi və kiçik və orta sahibkarlıq (KOS) siyasəti üzrə ölkədə institusional çərçivə, əməliyyat mühiti və sahibkarlığın inkişafına dövlət dəstəyi, biznesin inkişafı xidmətləri, dövlət-özəl dialoqu və innovasiya siyasəti barədə digər ölkələrlərdən olan nümayəndə heyətlərini məlumatlandırıb.

Tədbir çərçivəsində İqtisadi Əməkdaşlıq və İnkişaf Təşkilatı, Avropa Yenidənqurma və İnkişaf Bankı və Avropa Təlim Fondunun nümayəndələri ilə iki tərəfli görüşlər keçirilib və hesabatın son layihəsinin hazırlanması üzrə ayrı-ayrılıqda işçi  müzakirələr aparılıb.

Qeyd edək ki, Avropada Kiçik Biznes Aktının Qiymətləndirmə Hesabatında  ölkələrin KOS siyasəti üzrə İndeksi (SME Policy İndex) təqdim olunur və Avropa Komissiyası, Avropa Yenidənqurma və İnkişaf Bankı və Avropa Təlim Fondunun birgə təşəbbüsü ilə 2006-cı ildən etibarən dörd region üzrə 32 ölkəni əhatə edir.