İqtisadi İslahatların Təhlili və Kommunikasiya Mərkəzinin (İİTKM) innovasiya, sahibkarlıq və investisiya təşviqi istiqamətləri üzrə fəaliyyəti Qazaxıstanda təqdim edilib.

İİTKM-in "Enterprise Azerbaijan" portalının rəhbəri İsa Qasımov Qazaxıstanın "KIT" Beynəlxalq Sahibkarlar Birliyi, “ATAMEKEN” Milli Sahibkarlar Palatası və “Astana Hub” daxil olmaqla bir sıra qurumlarda işgüzar görüşlər keçirib.

Görüşlərdə "Enterprise Azerbaijan" portalının fəaliyyəti, həyata keçirilən "Startup School" proqramlarının qlobal innovasiya və sahibkarlıq ekosistemləri arasında əməkdaşlığın inkişaf etdirilməsi, Azərbaycanın investisiya cəlbediciliyinin təşviqi və Türk Dünyasında biznes əlaqələrinin gücləndirilməsi istiqamətində əhəmiyyəti vurğulanıb.

“KIT” Beynəlxalq Sahibkarlar Birliyinin rəhbəri, tanınmış iş adamı Dauren Bimov ilə keçirilən görüşdə Azərbaycan və Qazaxıstan arasında biznes və startap ekosistemləri üzrə əməkdaşlığın genişləndirilməsi, sahibkarlığın dəstəklənməsi üçün institusional mexanizmlərin təkmilləşdirilməsi müzakirə olunub. Dauren Bimov "Enterprise Azerbaijan" portalının tərəfdaşlığı ilə 2026-cı ilin 30-31 oktyabr tarixlərində Bakıda keçiriləcək "TEI Forum 2026” (Trade, Export and Innovation Forum) tədbirində spiker kimi iştirak edəcək. Bu forumda “Startup School 4: Beş qitə – 500 Startap” qlobal innovasiya proqramının "Demo Day" tədbiri təşkil olunacaq.

Səfər çərçivəsində Qazaxıstanın ən böyük biznes təşkilatlarından olan "ATAMEKEN" Milli Sahibkarlar Palatasının direktoru Alin Kanat Toleybekoviç ilə də görüş keçirilib. Görüşdə sahibkarlığın inkişafı, biznes mühitinin dəstəklənməsi, Türk Dünyasının iqtisadi potensialının daha səmərəli dəyərləndirilməsi və gələcək əməkdaşlıq imkanları müzakirə olunub. Müzakirələrdə Astanada fəaliyyət göstərən Türk İş Adamları Assosiasiyasının direktoru Gülnura Serikovna Şeripova da iştirak edib. Tərəflər biznes əlaqələrinin inkişaf etdirilməsi imkanlarını dəyərləndiriblər.