Ümummilli Lider Heydər Əliyevin anadan olmasının 100 illik yubileyi ilə əlaqədar İqtisadi İslahatların Təhlili və Kommunikasiya Mərkəzində (İİTKM) toplantı keçirilib. Mərkəzin icraçı direktoru Vüsal Qasımlı Ulu Öndərin həm sovet dönəmindəki, həm də müstəqillik illərindəki hərtərəfli fəaliyyəti ilə bağlı ətraflı məlumat verib. Bildirib ki, hələ sovet dönəmində Heydər Əliyev qeyri-adi idarəçilik bacarığı, polad iradəsi və yüksək vətənpərvərliyi sayəsində Azərbaycan iqtisadiyyatını 3-cü sənaye inqilabının tələblərinə uyğun reform etməyə nail olub. 1969-1985-ci illərdə verilmiş qərarlar sayəsində ölkədə istehsal edilən sənaye məhsulları öz həcminə görə əvvəlki 50 ildəkinə bərabər olub. Bu illər ərzində istehsal edilən milli gəlir 2.6, sənaye məhsulunun həcmi 2.7, kənd təsərrüfatı məhsulları isə 2.3 dəfə artıb. Ulu Öndərin bu uğurlu idarəçilik modeli müstəqillik illərində də davam edib. Azərbaycan iqtisadiyyatının dərin böhran içində olduğu 1990-cı illərdə Heydər Əliyev əvvəlcə ictimai-siyasi sabitliyi bərpa edib və “Əsrin müqaviləsi”nin imzalanmasına nail olmaqla Azərbaycan iqtisadiyyatının dirçəlməsi mərhələsini başladıb. Bunun nəticəsi olaraq, 2002-ci il dövlət büdcəsi 1993-cü ilə nisbətən 85.1 dəfə artaraq, 910.2 milyon manata çatıb. Ulu Öndərin uğurlu neft straftegiyası isə Azərbaycanın davamlı və stabil inkişafını təmin edib.

Vüsal Qasımlı qeyd edib ki, Heydər Əliyev yalnız iqtisadi sahədə deyil, digər sahələrdə - hərbi, sosial, mədəni sahələrdə də uğurlu qərarlar qəbul etməklə Azərbaycanın hərtərəfli inkişafını və ümumilikdə dövlətçiliyin möhkəmlənməsini təmin edib. Bu baxımdan 2020-ci ildə Vətən müharibəsində əldə olunmuş böyük qələbədə də Ulu Öndərin müstəsna payı var.

2023-cü ilin “Heydər Əliyev İli” olduğunu xatırladan Vüsal Qasımlı bildirib ki, Mərkəz bu il çərçivəsində bir sıra fəaliyyətlər həyata keçirir, müxtəlif miqyaslı tədbir və konfranslar təşkil edir, jurnal və kitablar, həmçinin videoicmallar hazırlayır.