İqtisadi İslahatların Təhlili və Kommunikasiya Mərkəzində (İİTKM) Azərbaycan Respublikasının Prezidenti yanında Dövlət İdarəçilik Akademiyasının (DİA) dəstəyi ilə ölkəmizdə səfərdə olan Qazaxıstan Respublikasının Prezidenti yanında Dövlət İdarəçilik Akademiyasının nümayəndə heyəti ilə görüş keçirilib.

“Dövlət idarəçiliyində innovativ texnologiyalar: Azərbaycan Respublikasının təcrübəsi” mövzusunda keçirilən tədbirdə İİTKM-in Türk Dünyası Araşdırmalar Mərkəzinin rəhbəri İlyas Hüseynov “Türk dövlətlərinin rəqəmsal iqtisadiyyatı: Qlobal trendlər və regional reallıqlar” kitab layihəsi haqqında geniş məlumat verdi. Eyni zamanda kitabın qazaxıstanlı tədqiqatçıların tərəfindən fəsillərin yazılmasında iştirak imkanı müzakirə olundu.

 İİTKM-in operatoru olduğu “Azexport” portalının rəhbəri Ayxan Qədəşov Azərbaycanda rəqəmsal ixracın genişləndirilməsi istiqamətində həyata keçirilən tədbirlər haqqında məlumat verib.

“Enterprise Azerbaijan” portalının rəhbəri İsa Qasımov “Startup School 4" layihəsi haqqında qonaqlara məlumat verdikdən sonra Mərkəzi Asiyanın ən böyük innovasiya mərkəzlərindən biri hesab olunan “Astana Hub” arasında əməkdaşlığın qurulması məqsədilə Qazaxıstanın paytaxtı Astanada keçirilmiş görüşün nəticələri və Türk dövlətlərinin startap layihəsi haqqında qonaqlara məlumat verib.

Daha sonra Monitorinq və qiymətləndirmə şöbəsinin aparıcı məsləhətçisi Sevinc Cabbarova dövlət proqramlarının monitorinqi və qiymətləndirilməsi prosesinin İİTKM-in “e-monitorinq” portalı vasitəsilə həyata keçirilməsi üzrə mexanizmləri izah edib.

Qazaxıstan Respublikasının Prezidenti yanında Dövlət İdarəçilik Akademiyasının İdarəetmə İnstitutunun professoru Rauşan Dulambayeva birgə məqalələrin yazılması, İİTKM-nin elmi dərəcəli, yüksək elmi nailiyyətləri olan əməkdaşları ilə birgə layihələrin həyata keçirilməsi mexanizmləri ilə bağlı çıxış etdi.

Qazaxıstan Respublikasının Prezidenti yanında Dövlət İdarəçilik Akademiyasının İdarəetmə İnstitutunun professoru Serik Cumabayev İİTKM-nin elmi dərəcəli əməkdaşlarının Akademiyanın Dissertasiya şurasında iştirakı və elmi məsləhətçi kimi tədqiqatlara cəlb olunması imkanları haqqında məlumat verdi.

Qazaxıstan Respublikasının Prezidenti yanında Dövlət İdarəçilik Akademiyasının kiçik tədqiqatçı Murat Abuov öz tədqiqat işinin elmi nəticələri haqqında məruzə etdi.

İştirakçılar dövlət idarəçiliyində innovativ həllərin tətbiqinin genişləndirilməsi, rəqəmsal transformasiyanın sürətləndirilməsi və monitorinq mexanizmlərinin təkmilləşdirilməsi istiqamətində fikir mübadiləsi aparıblar. Qonaqlara Mərkəz tərəfindən nəşr olunan “Türk Dövlətlərinin İqtisadiyyatı” və “Orta Dəhliz: cari reallıqların təhlili və perspektivlərin dəyərləndirilməsi” kitabları hədiyyə olunub.