İqtisadi İslahatların Təhlili və Kommunikasiya Mərkəzinin (İİTKM) təşkilatçılığı ilə Dövlət Proqramlarında nəzərdə tutulmuş layihələrin monitorinq və qiymətləndirilməsinin daha səmərəli və mərkəzləşdirilmiş şəkildə həyata keçirilməsi üçün yaradılmış modulun istifadə qaydalarına dair təlimlərə başlanılıb.

İqtisadi İslahatların Təhlili və Kommunikasiya Mərkəzinin Monitorinq və qiymətləndirmə şöbəsinin əməkdaşı Gültac Əhmədzadə-Tapdıqzadə iştirakçılara "Layihə idarəetməsi" modulunun funksionallığı, məlumatların modula daxil edilməsi və hesabatlılığın formalaşdırılması haqqında geniş məlumat verib.

Təlimlər həftə boyunca və ümumilikdə 50-dən çox dövlət qurumunu əhatə edəcək. Hər bir təlim praktiki təqdimat və interaktiv müzakirələrlə müşayiət olunacaq.

İlk təlim sessiyaları Azərbaycan Respublikasının Baş Prokurorluğu, Azərbaycan Respublikasının Daxili İşlər Nazirliyi, Azərbaycan Respublikasının İqtisadiyyat Nazirliyi, Azərbaycan Respublikasının Maliyyə Nazirliyi, Azərbaycan Respublikasının Rəqəmsal İnkişaf və Nəqliyyat Nazirliyi, Azərbaycan Respublikasının Əmək və Əhalinin Sosial Müdafiəsi Nazirliyi, Azərbaycan Respublikasının Energetika Nazirliyi, Azərbaycan Respublikasının Ekologiya və Təbii Sərvətlər Nazirliyi, Azərbaycan Respublikasının Gənclər və İdman Nazirliyi və Azərbaycan Respublikasının Mədəniyyət Nazirliyinin nümayəndələrinin iştirakı ilə keçirilib.

Qeyd edək ki, "Layihə idarəetməsi" modulu Azərbaycan Respublikası Nazirlər Kabinetinin müvafiq tapşırıqları əsasında İqtisadi İslahatların Təhlili və Kommunikasiya Mərkəzi və İnformasiya Texnologiyaları və Məlumat İdarəetmə Mərkəzi tərəfindən  “Azərbaycan Respublikasının 2022-2026-cı illərdə sosial-iqtisadi inkişaf Strategiyasının monitorinq və qiymətləndirmə Portalı”, “İşğaldan azad edilmiş ərazilərə Böyük Qayıdışa dair Dövlət Proqramının icrasına nəzarət və hesabatlılıq Portalı” və “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramının icrasının monitorinqi və hesabatlılıq modulu” elektron portallarında hazırlanıb.