İqtisadi İslahatların Təhlili və Kommunikasiya Mərkəzinin opretoru olduğu “Enterprise Azerbaijan” portalının həyata keçirdiyi “Startup School 4: Five Continents - 500 Startups” qlobal innovasiya proqramı çərçivəsində Afrika qitəsindən olan tərəfdaşlar ictimaiyyətə təqdim olunub.

Beynəlxalq əməkdaşlığı, bilik mübadiləsini və qlobal imkanlara çıxışı təşviq etmək məqsədi daşıyan proqrama bu dəfə Afrika regionundan nüfuzlu təşkilatlar dəstək verəcək:

"New Mansoura University" (Misir) - İnnovasiya və qlobal rəqabətədavamlılığa fokuslanmış yeni nəsil ağıllı universitetdir. Bu ali təhsil müəssisəsi proqram çərçivəsində təlim və mentorluq xidmətləri göstərəcək, həmçinin misirli startapların proqrama cəlb edilməsinə dəstək verəcək.

Efiopiya Dövlət Qulluğu Universitetinin Liderlik və Yaxşı İdarəetmə İnstitutu (Efiopiya) - Potensialın qurulması və liderliyin inkişafı sahəsində aparıcı dövlət təşkilatıdır. Bu tərəfdaşlıq efiopiyalı startapların proqrama cəlb edilməsi və inteqrasiyasına fokuslanacaq.

"Delphi Ltd." (Madaqaskar) - Təlim və mentorluq sahəsində ixtisaslaşan peşəkar qurumdur. Qurum madaqaskarlı startapların iştirakını dəstəkləməklə bərabər onlara mentorluq və təlim xidmətləri təqdim edəcək.

Afrika startapları bu proqrama müraciət etməklə qlobal mentor dəstəyi, təcrübə paylaşımı və beynəlxalq şəbəkələrlə əlaqə imkanları əldə edəcəklər. Bu həmçinin onların innovativ ideyalarını inkişaf etdirmək və potensial investorlara çıxışını təmin etmək üçün unikal fürsətdir.

Qeyd edək ki, “Startup School 4” layihəsinə startapların onlayn qeydiyyatı davam edir. Layihə bu il beş qitədən 500 startapı cəlb etməyi hədəfləyir. İnnovativ ideyası və ya startapı olan, eləcə də qlobal şəbəkələşmə, mentorluq və investisiya imkanlarından yararlanmaq istəyən şəxslər layihəyə müraciət etməyə dəvət olunur.

Qlobal innovasiya şəbəkəsinə qoşulmaq və gələcəyini "Startup School 4" ilə qurmaq istəyən hər kəs üçün qeydiyyat prosesi aktivdir.

Qeydiyyat üçün link: startupschool.az/en/register

Startapların qeydiyyatı 15 may 2026-cı il tarixinədək davam edəcək.