İqtisadi İslahatların Təhlili və Kommunikasiya Mərkəzinin (İİTKM) nəzdində fəaliyyət göstərən “Enterprise Azerbaijan” portalı tərəfindən “Startup School 3” layihəsi çərçivəsində “Yaşıl və Rəqəmsal İpək Yolu” beynəlxalq akselerasiya proqramının final mərhələsini əhatə edən “Demo-Day” tədbiri keçirilib. Tədbir Azərbaycan İnnovasiya Mərkəzində keçirilib və ölkədə innovasiya fəaliyyəti, startap ekosistemi və rəqəmsal transformasiya sahəsində görülən işlərin təqdimatı baxımından əhəmiyyətli platforma kimi çıxış edib.

Tədbirin ilk mərhələsi startap sərgisi ilə başlayıb. Akselerasiya proqramının final mərhələsinə çıxmış 30 startap komandası hazırladıqları layihələri xüsusi sərgi stendlərində nümayiş etdirərək iştirakçıların və münsiflərin diqqətinə təqdim ediblər. Sərgidə nümayiş olunan layihələr yaşıl enerji, rəqəmsal texnologiyalar, tibb və sağlamlıq, aqrar innovasiyalar, süni intellekt, təhsil texnologiyaları, turizm, kimya sənayesi və digər sahələri əhatə edən geniş innovasiya spektrini özündə birləşdirib. Münsiflər heyəti təqdim olunan layihələri innovativlik, tətbiq oluna bilmə potensialı, komanda hazırlığı və kommersiyalaşdırma imkanları kimi kriteriyalar üzrə qiymətləndirərək ən yaxşı yeddi startapı növbəti mərhələyə seçib. Həmçinin, günün ümumi qalibləri də bu mərhələdə müəyyən olunub.

Tədbirin növbəti hissəsi şəbəkələşmə və rəsmi açılış nitqləri ilə davam edib. Açılış mərasimində İİTKM-in icraçı direktoru, professor Vüsal Qasımlı, Ailə, Qadın və Uşaq Problemləri üzrə Dövlət Komitəsinin sədri Bahar Muradova, İnnovasiya və Rəqəmsal İnkişaf Agentliyinin İdarə Heyətinin sədri Fərid Osmanov, Energetika Nazirliyi yanında Bərpa Olunan Enerji Mənbələri Dövlət Agentliyinin direktoru Cavid Abdullayev çıxış edərək ölkədə innovasiya mühitinin inkişafı, startapların dəstəklənməsi və beynəlxalq tərəfdaşlıqların gücləndirilməsi istiqamətində görülən işlər barədə fikirlərini bölüşüblər. Ardınca “Enterprise Azerbaijan” portalının rəhbəri İsa Qasımov akselerasiya proqramının məqsədləri, mərhələləri və əldə olunan nəticələr barədə məlumat verib.

Tədbir çərçivəsində seçilmiş ən perspektivli yeddi startap komandasının – “Agro Gemtin”, “Smart Bin”, “The Bioplastic”, “Green Guest”, “SoilCredit”, “Zeuph” və “Science Delta” layihələrinin təqdimatları keçirilib. Komandalar layihələrinin mahiyyətini, tətbiq sahələrini və innovasiya dəyərini auditoriyaya təqdim ediblər. Təqdimatlardan sonra professor Vüsal Qasımlı münsiflər heyətinin üzvlərinə göstərdikləri dəstəyə görə “Təşəkkürnamə” təqdim edib. Daha sonra münsiflər heyətinin üzvləri — Synapses Ventures təmsilçisi Murat Baday və A8 Acceleration Center nümayəndəsi Gonca Kara çıxış edərək tədbirin regional innovasiya ekosisteminə verdiyi töhfələri dəyərləndiriblər.

Tədbirin yekununda qaliblərin adları elan olunub. Üçüncü yerin qalibi olan “The Bioplastic” Elm və Təhsil Nazirinin müşaviri Nicat Məmmədli tərəfindən açıqlanıb. İkinci yerin qalibi “Smart Bin” Dövlət İdarəçilik Akademiyasının rektoru Urxan Ələkbərov tərəfindən elan olunub və mükafat Gənclər və idman nazirinin müavini İndira Hacıyeva tərəfindən təqdim edilib. Birinci yerin qalibi “Agro Gemtin” isə İİTKM-in icraçı direktoru professor Vüsal Qasımlı tərəfindən elan edilərək mükafatlandırılıb.

“Startup School 3” layihəsi innovativ ideyalar əsasında fəaliyyət göstərən startapların inkişafına təkan vermək, yaşıl və rəqəmsal sahələrdə yeni texnoloji həllərin yaradılmasını təşviq etmək, həmçinin bu istiqamətdə beynəlxalq əməkdaşlığı gücləndirmək məqsədilə həyata keçirilir. Layihə startapların bilik, bacarıq və resurs imkanlarını artırmaqla onların regional və qlobal bazarlara inteqrasiyasına dəstək göstərir.