İqtisadi İslahatların Təhlili və Kommunikasiya Mərkəzinin (İİTKM) əməkdaşları ABŞ-ın Stanford Universitetindən sahibkar və Akademik Dr. Murat Baday ilə görüş keçiriblər. Görüşdə elmi-texnoloji innovasiyalar, süni intellekt, rəqəmsal iqtisadiyyat və startap ekosistemində beynəlxalq əməkdaşlıq imkanları müzakirə olunub.

Müzakirə zamanı Mərkəzin operatoru olduğu “Enterprise Azerbaijan” portalının rəhbəri İsa Qasımov “Startup School 3” layihəsi çərçivəsində həyata keçirilən “Yaşıl və Rəqəmsal İpək Yolu” (Green and Digital Silk Road) Beynəlxalq Akselerasiya Proqramı barədə ətraflı məlumat təqdim edib. O qeyd edib ki, proqramın əsas məqsədi yaşıl texnologiyalar və rəqəmsal innovasiyalar sahəsində fəaliyyət göstərən startaplara dəstək vermək, onları qlobal bazarlara çıxışa hazırlamaq və regional əməkdaşlığı gücləndirməkdir.

Stanford Universitetinin professoru Murat Baday çıxışı zamanı ABŞ və digər inkişaf etmiş ölkələrdə innovasiya və texnologiya siyasətləri, elmi araşdırmaların kommersiyalaşdırılması, həmçinin süni intellektin tətbiqi üzrə təcrübələri bölüşüb. O, Azərbaycanda bu istiqamətdə atılan addımları yüksək qiymətləndirərək, elmi-texnoloji əməkdaşlıq imkanlarının genişləndirilməsinin vacibliyini vurğulayıb. Professor, həmçinin startapların inkişafı üçün intensiv təlim proqramları, bootcamplar, ideya və innovasiya müsabiqələrinin keçirilməsinin əhəmiyyətini qeyd edib. O bildirib ki, bu cür təşəbbüslər gənc təşəbbüskarların potensialını üzə çıxarmaq və onları beynəlxalq innovasiya platformalarına hazırlamaq baxımından olduqca önəmlidir.

Mərkəzin operatoru olduğu Rəqəmsal Ticarət Qovşağının (RTQ) rəhbəri Aygün Əhmədova ölkədə rəqəmsallaşma sahəsində həyata keçirilən layihələr, süni intellektin tətbiqi və bu istiqamətdə mövcud imkanlarla yanaşı qarşıda duran çağırışlar barədə məlumat verib. O, həmçinin Rəqəmsal Ticarət Qovşağının əsas fəaliyyəti, rəqəmsal texnologiyaların təşviqi və bu sahədə beynəlxalq əməkdaşlığın genişləndirilməsi istiqamətində görülən işlər barədə də ətraflı danışıb.

Tərəflər elmi və texnoloji innovasiyaların dəstəklənməsi, startapların inkişafı və qlobal bazalarla inteqrasiyası istiqamətində əməkdaşlıq imkanlarını müzakirə ediblər. Görüşün sonunda əməkdaşlığın qurulması, xüsusilə Akselerasiya proqramında təlim-mentorluq, startapların qiymətləndirilməsi və investisiya resurslarının cəlb edilməsi haqqında razılıq əldə olunub.