Azərbaycan Respublikası İqtisadi İslahatların Təhlili və Kommunikasiya Mərkəzinin (İİTKM) aparıcı universitetlərdə iqtisadi islahatların təbliğinə dair təşkil etdiyi daha bir ictimai mühazirə Bakı Ali Neft Məktəbində (BANM) reallaşıb.

İİTKM-in icraçı direktoru Vüsal Qasımlının “Azərbaycanda iqtisadi islahatlar: Nailiyyətlər və perspektivlər” mövzusunda mühazirəsindən öncə Bakı Ali Neft Məktəbinin rektoru Elmar Qasımov professor-müəllim və tələbə heyətini salamlayaraq bildirib ki, Ali Məktəbdə bu tip tədbirlərin təşkil edilməsi tələbələrin inkişafı və təfəkkürün formalaşması üçün vacibdir. Elmar Qasımov əlavə edib ki, Azərbaycan Respublikası Prezidenti İlham Əliyevin yürütdüyü siyasət nəticəsində bağlanan neft müqavilələri xalqın rifah halının yaxşılaşmasına xidmət edir, ölkədə mövcud neft gəlirləri hesabına Azərbaycanın yüzlərlə gənci xaricdə təhsil alıb daha sonra vətənə qayıdaraq, əldə etdikləri bilikləri bölüşürlər. Bu isə Ümummilli lider Heydər Əliyevin də dediyi kimi neft kapitalının insan kapitalına çevrilməsinə imkan yaradır.  BANM-in rektoru ölkədə aparılan islahat prosesinə toxunaraq əlavə edib ki, nağdsız hesablaşmaların aparılması, ödəniş və gömrük sisteminin şəffaflaşdırılması istiqamətində nəzərə çarpan dəyişiklik var.

İİTKM- nin icraçı direktoru Vüsal Qasımlı bildirib ki, Azəbaycanda neft strategiyasını həyata keçirməklə iqtisadi təhlükəsizliyin əsas komponentləri - nəqliyyat, logistika, ərzaq və maliyyə təhlükəsizliyi təmin olunub: “Hazırda əldə edilmiş nailiyyətlərin və ictimai-siyasi sabitliyin əsasında islahatların yeni mərhələsinə qədəm qoyulub. İnstitutsional və struktur islahatları ilə yanaşı, həm də biznes mühitinin yaxşılaşdırılması və iqtisadi təşviq mexanizmlərinin tətbiqi inkişafa aparır. Belə ki, 2018-ci ildə ölkədə sürətli iqtisadi artım proqnozlaşdırılır. Artımın əsas drayverlərindən biri isə insan kapitalıdır.”

Vüsal Qasımlı həmçinin ölkədə həyata keçirilən strateji yol xəritələri və yeni iqtisadi model quruculuğu barədə ətraflı məlumat verdi.

Mühazirənin sonunda icraçı direktor auditoriyanın suallarını cavablandırdı və tədbirin təşkil olunmasında göstərdiyi dəstəyə görə Bakı Ali Neft Məktəbinin rektoruna təşəkkürünü bildirdi.