İqtisadi İslahatların Təhlili və Kommunikasiya Mərkəzində (İİTKM) Ümumdünya Şəhərsalma Forumu (WUF13) çərçivəsində ölkəmizdə səfərdə olan Pakistan İslam Respublikasının Pəncab əyalətinin Baş nazirinin süni intellekt və xüsusi təşəbbüslər üzrə müşaviri Ali Darın rəhbərlik etdiyi nümayəndə heyəti ilə görüş keçirilib. Nümayəndə heyətinin tərkibində Pakistanın yüksəkrütbəli dövlət rəsmiləri, aparıcı sahibkarları və Pakistanda fəaliyyət göstərən Azərbaycan Ticarət Evinin rəhbəri iştirak ediblər.

Pakistan nümayəndə heyətinə İİTKM-in operatoru olduğu "Azexport.az" portalının fəaliyyət mexanizmləri, onun qlobal elektron ticarət platformaları ilə inteqrasiyası və yerli sahibkarların məhsullarının beynəlxalq bazarlara çıxarılması istiqamətində yaradılan imkanlar barədə məlumat verilib.

Pəncab əyalətinin Baş nazirinin müşaviri Ali Dar bildirib ki, Azərbaycan və Pakistan arasında elektron ticarət sahəsində əlaqələrin dərinləşdirilməsi, hər iki ölkənin iqtisadi potensialının rəqəmsal müstəvidə reallaşması üzrə əməkdaşlıqda maraqlıdırlar. Xüsusilə bu sahədə qabaqcıl layihələrdən olan “Azexport” təcrübəsinin Pakistanda tətbiqi istiqamətində addımlar atılacaq.

"Azexport" portalının rəhbəri Ayxan Qədəşov Pakistanın son illərdə rəqəmsal həllər, texnoloji innovasiyalar və insan kapitalının inkişafı sahəsində əldə etdiyi beynəlxalq miqyaslı uğurları yüksək qiymətləndirib. O, Azərbaycanın elektron ticarət infrastrukturunun qurulması və institusional mexanizmlərin formalaşdırılması sahəsindəki təcrübəsini Pakistan tərəfi ilə bölüşməyə hər zaman hazır olduqlarını ifadə edib.

Görüşdə İİTKM-in digər innovativ layihəsi olan "Enterprise Azerbaijan" portalı da nümayəndə heyətinə təqdim edilib. Portalın rəhbəri İsa Qasımov platformanın ölkədə startap ekosisteminin inkişafı, investisiyaların cəlb edilməsi və gənc sahibkarlara dəstək istiqamətindəki fəaliyyəti barədə məlumat verib.

Qeyd edək ki, Prezident İlham Əliyev mayın 17-də Pakistan İslam Respublikasının Pəncab əyalətinin Baş naziri Məryəm Nəvaz Şərifin başçılıq etdiyi nümayəndə heyətini qəbul edib.