İqtisadi İslahatların Təhlili və Kommunikasiya Mərkəzinin operatoru olduğu Azexport portalı ixracatçı şirkətlərin yeni bazarlara çıxışını dəstəkləmək yönündə fəaliyyətini genişləndirir. Bu məqsədlə Azexport portalı ixrac zamanı sərbəst satış sertifikatına ehtiyac duyan şirkətlərin sorğularını operativ cavablandırır və onları müvafiq sənədlə təmin edir. Azexport portalı tərəfindən sərbəst satış sertifikatı verilən şirkətlər yeni bazarlara ixracda uğur qazanaraq, bu istiqamətə fəaliyyətlərini genişləndirmək üçün sertifikatlarını yeniləməyə başlayıb. Bu baxımdan “Made in Azerbaijan” brendi adı altında kosmetik məhsullar istehsal edən “Gazelli Group” şirkətinin fəaliyyəti xüsusi qeyd edilməlidir. Bu şirkət 2019-2020-ci illərdə də məhsul ixracını artırmaq üçün sərbəst satış sertifikatını yenilənməsinə ehtiyac duyub. “Gazelli Group” şirkətinin bununla bağlı sorğusu Azexport portalı tərəfindən müsbət qarşılanıb və ona verilən sertifikatlar yenilənib. Azexport portalının təqdim etdiyi sərbəst satış sertifikatı vasitəsi ilə sözügedən şirkətin qarşıdakı müddətdə Səudiyyə Ərəbistanı və Birləşmiş Ərəb Əmirliklərinə 64  adda məhsul üzrə ixrac reallaşdıracaqdır.

  Azexport portalının meneceri Ayxan Qədəşovun sözlərinə görə, sərbəst satış sertifikatı hazırda dünyada könüllü xarakter daşıyan sertifikatdır: “Qida, dərman və insan orqanizmi ilə birbaşa təmasda olan məhsullara nəzarətin daha da güclənəcəyini nəzərə alsaq, bu sertifikatın ixracatçı şirkətlər üçün icbari sertifikatlar siyahısına daxil edilməsi ehtimalı böyükdür.”

   Qeyd edək ki, sərbəst satış sertifikatı Azərbaycanda ilk dəfə Azexport portalı tərəfindən təqdim olunub. Sertifikatın verilməsi ilə “Made in Azerbaijan” brendi adı altında istehsal olunan qida, dərman və insan orqanizmi ilə birbaşa təmasda olan məhsullar artıq Filippin, İndoneziya, Dominikan, Səudiyyə Ərəbistanı, Qətər, Birləşmiş Ərəb Əmirlikləri, Amerika, Çin və s., ölkələrə ixrac olunmağa başlanılıb. Bu isə “Made in Azerbaijan” brendi adı altında istehsal olunan məhsulların ixrac coğrafiyasının genişlənməsinə, qeyri-neft ixracının artmasına töhfə verir.