İqtisadi İslahatların Təhlili və Kommunikasiya Mərkəzində Azərbaycanda ilk dəfə “Əks kreaton” ("Reverse Creathon") keçirilib. Tədbiri Enterpriseazerbaijan.com portalı Britaniya Şurası və Nyukasl (Newcastle) Universiteti ilə birgə həyata keçirdiyi "Creative Spark" layihəsi çərçivəsində təşkil edib.

İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı seminarda açılış nitqi ilə çıxış edib. İcraçı direktor bildirib ki, Azərbaycanın belə bir ilkə imza atması təqdirəlayiqdir: “İlk dəfə olaraq tələbələrimiz biznes nümayəndələrinə öz təkliflərini kreaton çərçivəsində təqdim edəcəklər. Gənc nəslin texnoloji imkanları və gözləntiləri biznes həllərin təkmilləşdirilməsi üçün faydalıdı. Adətən biznes nümayəndələri gənclərə tövsiyyə edirdi, indi əksinə olacaq: gənclərimiz öz ideyaları ilə biznes modelin təkmilləşdirilməsində iştirak edəcəklər. Enterpriseazerbaijan.com portalı gənclərin biznes ideyalarının gerçəkləşməsində beynəlxalq partnyorları ilə birgə yaxından iştirak edir.”

Qeyd edək ki, kreatonda Birminqam Universitetinin professoru Simon Doun, Nyukasl Universitetinin doktorları Paul Riçter və Fiona Utihörst, eləcə də, yerli gənc bizneslər və tələbələr iştirak edib.

Fiona Utihörst bildirib ki, İqtisadi İslahatların Təhlili və Kommunikasiya Mərkəzi “Əks kreaton”un təşkilinə şərait yaratmaqla beynəlxalq təcrübənin bölüşdürülməsi üçün əlverişli imkan yaradır.

 İki gün davam edəcək intensiv seminarın əsas məqsədi gənc tələbələrin və biznes sahiblərinin bir araya gələrək cari biznesin çətinlikləri, mümkün inkişaf istiqamətləri və strategiyaları mövzusunda innovativ müzakirələr aparmaqdır. Seminarın sonunda iştirakçılara sertifikatlar təqdim olunacaq.