Prezident İlham Əliyevin Fərmanı ilə “İqtisadi İslahatların Təhlili və Kommunikasiya Mərkəzinin Nizamnaməsi”nə əlavələr edilib. Fərmana əsasən “İqtisadi İslahatların Təhlili və Kommunikasiya Mərkəzinin Nizamnaməsi”nə aşağıdakı məzmunda 2.2.13-1-ci yarımbənd əlavə edilib: “Azərbaycan Respublikasında istehsal olunan mallar və həmin malların istehsalçıları barədə məlumatları əks etdirən, ən azı üç dildə (Azərbaycan, ingilis və rus dillərində) fəaliyyət göstərən internet portalının fəaliyyətini, malların istehsalçıları tərəfindən məlumatların həmin portalda yerləşdirilməsi üçün təbliğat-təşviqat tədbirlərinin həyata keçirilməsini və portal barədə məlumatın kütləvi informasiya vasitələri ilə yayılmasını təmin edir”.

   Qeyd edək ki, bu Fərman Prezident İlham Əliyevin 2016-cı il 21 sentyabr tarixli "Azərbaycan Respublikasında istehsal olunan malların vahid məlumat bazasının yaradılması haqqında" Sərəncamı  ilə İqtisadi İslahatların Təhlili və Kommunikasiya Mərkəzinə tapşırılan fəaliyyətin yerinə yetirilməsinə töhfə verəcəkdir.

  Prezidentin digər Fərmanı ilə isə “Yerli icra hakimiyyətləri haqqında Əsasnamə” yə 3.5.2-1-ci yarımbənd əlavə edilib: “Müvafiq ərazidə fəaliyyət göstərən malların istehsalçıları və onların istehsal etdikləri mallar barədə məlumatların Azərbaycan Respublikası Prezidentinin 2016-cı il 21 sentyabr tarixli 2349 nömrəli Sərəncamı ilə yaradılmış internet portalında yerləşdirilməsinin təmin edilməsi istiqamətində təşviqedici tədbirlər həyata keçirir və yenilənərək aktual saxlanmasına nəzarət edir”.

Prezident İlham Əliyevin bu fərmanları normativ hüquqi aktların 2349 nömrəli Sərəncama uyğunlaşdırılmasını təmin edəcək və İqtisadi İslahatların Təhlili və Kommunikasiya Mərkəzi tərəfindən yaradılan Azərbaycan Respublikasında istehsal olunan mallar və həmin malların istehsalçıları barədə məlumatları əks etdirən İnternet portalının uğurlu fəaliyyətinə zəmin olacaq.