“Azərbaycan Respublikasının 2022-2026-cı illərdə sosial-iqtisadi inkişaf Strategiyası”nın 2024-cü il üçün nəzərdə tutulmuş hədəfləri çərçivəsində həyata keçirilən işlərin icrasına dair “İnnovasiya” İşçi qrupunda videokonfrans formatında müzakirə keçirilib.

Açılış nitqi ilə çıxış edən İşçi qrupun sədri, rəqəmsal inkişaf və nəqliyyat nazirinin müavini Samir Məmmədov Strategiyada qeyd olunan məqsədlərin icrası istiqamətində görülməli işlər, qarşıya qoyulan hədəflər barədə danışıb.

Sonra İqtisadi İslahatların Təhlili və Kommunikasiya Mərkəzinin əməkdaşları ilə İşçi qrupun üzvləri arasında cari ilin indikatorları üzrə hədəflər ətrafında müzakirə aparılıb, rəy və təkliflər diqqətə çatdırılıb.

“İnnovasiya” İşçi qrupunda RİNN və İİTKM-lə yanaşı, İqtisadiyyat, Elm və Təhsil, Maliyyə, Əmək və Əhalinin Sosial Müdafiəsi, Ədliyyə, Müdafiə Sənayesi, Kənd Təsərrüfatı, Mədəniyyət və Energetika nazirlikləri, həmçinin Mərkəzi Bank, Dövlət Gömrük Komitəsi, Diasporla İş üzrə Dövlət Komitəsi, Prezident yanında Vətəndaşlara Xidmət və Sosial İnnovasiyalar üzrə Dövlət Agentliyi, Dövlət Su Ehtiyatları Agentliyi, Dövlət Miqrasiya Xidməti, Dövlət Sərhəd Xidməti, Əqli Mülkiyyət Agentliyi və AMEA-nın müvafiq şöbə və bölmələrinin rəhbər şəxsləri təmsil olunurlar.

Qeyd edək ki, Azərbaycan Respublikası Baş nazirinin 12 iyun 2023-cü il tarixli Sərəncamı ilə “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nda nəzərdə tutulmuş tədbirlərin tam, vaxtında və effektiv icrasını təmin etmək və aidiyyəti dövlət orqanlarının fəaliyyətlərinin əlaqələndirilməsi məqsədilə 8 İşçi qrup yaradılıb. “İnnovasiya” İşçi qrupu da bu çərçivədə “Yaradıcı və innovativ cəmiyyət” məqsədinin yerinə yetirilməsi və aidiyyəti dövlət orqanlarının fəaliyyətlərinin əlaqələndirilməsini həyata keçirir.