İqtisadi İslahatların Təhlili və Kommunikasiya Mərkəzinin (İİTKM) operatoru olduğu "Enterprise Azerbaijan" portalı ABŞ-ın Nevada Universiteti və Almaniyanın Süni İntellekt Araşdırma Mərkəzi ilə tərəfdaşlığı çərçivəsində "Startup School 3: Green and Digital Silk Road" beynəlxalq akselerasiya proqramına başlayır.

“Green and Digital Silk Road” (Yaşıl və Rəqəmsal İpək Yolu) devizi altında keçirilən bu beynəlxalq təşəbbüs 2025-ci ilin aprel-dekabr aylarını əhatə edəcək. Layihə rəqəmsal və yaşıl inkişaf sahəsində fəaliyyət göstərən startaplara dəstək verməklə yanaşı, regionda innovasiya ekosisteminin möhkəmlənməsi, beynəlxalq tərəfdaşlıqların qurulması və qabaqcıl təcrübələrin mübadiləsi üçün geniş imkanlar yaradacaq.

Proqramın əsas məqsədi rəqəmsallaşma və yaşıl texnologiyalar sahəsində məhsul və ya xidmət təqdim edən startapların inkişafına şərait yaratmaq, innovativ ideyaların regional inteqrasiyasını dəstəkləmək və startap ekosistemi iştirakçıları arasında əməkdaşlıq imkanlarını genişləndirməkdir.

Layihənin missiyası “Yaşıl və Rəqəmsal İpək Yolu” konsepsiyası əsasında iştirakçı ölkələrdə rəqəmsal transformasiya və ekoloji dayanıqlılığın inkişaf etdirilməsidir.

Proqrama Azərbaycan, Macarıstan, Türkiyə, Gürcüstan, Özbəkistan, Qazaxıstan, Türkmənistan, Qırğızıstan, Tacikistan, Əfqanıstan və Pakistan daxil olmaqla, Mərkəzi Asiya və qədim İpək Yolu üzərində yerləşən ölkələrdən startaplar müraciət edə bilər.

Layihəyə ABŞ, Almaniya, Çin, Cənubi Koreya, Türkiyə və Azərbaycandan olan tanınmış mentorlar cəlb ediləcək.

Qeyd edək ki, "Enterprise Azerbaijan" portalı buna qədər də “Startup School 1” və “Startup School 2 - AI for Green Solidarity” layihələrini uğurla icra edib.