İqtisadi İslahatların Təhlili və Kommunikasiya Mərkəzinin (İİTKM) təşkilatçılığı ilə Qiymət İzləmə Sisteminin (QİS) tətbiqi ilə bağlı müvafiq dövlət qurumlarının iştirakı ilə onlayn görüş keçirilib. Görüşdə “İnflyasiya və qiymət monitorinqi” üzrə İşçi qrupun oktyabr ayında keçirilmiş iclasının nəticəsi olaraq aidiyyəti dövlət qurumlarına verilmiş tapşırıqların icrası istiqamətində müzakirələr aparılıb.

İİTKM-in icraçı direktoru Vüsal Qasımlı QİS-in analitik çərçivəsi, əhatə edəcəyi məlumatlar və müvafiq dövlət qurumları arasında inteqrasiya istiqamətində görüləcək işlərlə bağlı məlumat verib. Bildirilib ki, QİS-in tətbiqi idxal-topdansatış-pərakəndə ticarət və yerli istehsal-topdansatış-pərakəndə satış zəncirlərində qiymət dəyişikliklərini izləməyə imkan verəcək və müvafiq dövlət qurumları üçün mühüm qərar qəbuletmə aləti rolunu oynayacaq. QİS müxtəlif dövlət qurumları və özəl qurumların məlumat bazalarının dataları əsasında qiymətlərin formalaşma nöqtələrini müəyyənləşdirmək imkanı verəcək. Sistemin yaradılması ilə müxtəlif dövlət qurumlarına və özəl məlumat təchizatçısına yığılan məlumatlar vahid bazaya inteqrasiya olunacaq və texniki uyğunluğu aparılacaq. Bu yolla müxtəlif mənbələrdən toplanan məlumatların analitik təhlilini aparmaq mümkün olacaq.

Bundan əlavə, görüşdə yaradılması nəzərdə tutulan rəqəmsal QİS-ə inteqrasiya olunmalı məlumatların strukturu, həmçinin layihənin icrası çərçivəsində nəzərdə tutulan tədbirlər barədə fikir mübadiləsi aparılıb.

Görüşdə Kənd Təsərrüfatı Nazirliyi, Səhiyyə Nazirliyi, Dövlət Gömrük Komitəsi, Dövlət Statistika Komitəsi, Mərkəzi Bank, İqtisadiyyat Nazirliyi yanında Dövlət Vergi Xidməti və İqtisadiyyat Nazirliyi yanında Antiinhisar və İstehlak Bazarına Nəzarət üzrə Dövlət Xidmətinin nümayəndələri iştirak ediblər.