İqtisadi İslahatların Təhlili və Kommunikasiya Mərkəzinin operatoru olduğu "Enterprise Azerbaijan" portalının təşəbbüsü ilə həyata keçirilən "Startup School 3" layihəsi çərçivəsində "Yaşıl və Rəqəmsal İpək Yolu" (Green and Digital Silk Road) beynəlxalq akselerasiya proqramına tərəfdaşların cəlbi prosesi uğurla davam etdirilir.

Proqram innovasiya, rəqəmsallaşma və yaşıl texnologiyalar sahəsində fəaliyyət göstərən startapları dəstəkləməyi, onların beynəlxalq ekosistemə inteqrasiyasını və investisiya ilə təminatını hədəfləyir.

Layihəyə bir sıra nüfuzlu yerli tərəfdaşlar cəlb olunub. Tərəfdaşlar sırasında Ekologiya və Təbii Sərvətlər Nazirliyi, Əqli Mülkiyyət Agentliyi, İnnovasiya və Rəqəmsal İnkişaf Agentliyi, Kiçik və Orta Biznesin İnkişafı Agentliyi (KOBİA), Bərpa Olunan Enerji Mənbələri Dövlət Agentliyi, İqtisadi Zonaların İnkişafı Agentliyi, “Azərenerji” ASC, Azərbaycan Respublikası Sahibkarlar (İşəgötürənlər) Təşkilatları Milli Konfederasiyası, Azərbaycan Respublikası Elm və Təhsil Nazirliyinin Yüksək Texnologiyalar Parkı, Rəqəmsal Ticarət Qovşağı (Digital Trade Hub), “Azexport” portalı və “Bir Pəncərə” İxraca Dəstək Mərkəzi kimi dövlət qurumları yer alır.

Eyni zamanda, layihə çərçivəsində "Caucasus Ventures", “SABAH.HUB”, “Founder Club”, “Innoland” İnkubasiya və Akselerasiya Mərkəzi, “Code Academy”, “Coders Azerbaijan”, “SUP.VC” və “Yeni Fikir” kimi özəl təşkilatlarla da əməkdaşlıq həyata keçirilir. Bu tərəfdaşlıqlar layihənin məqsədlərinə nail olunmasında və startap mühitinin inkişafında əhəmiyyətli rol oynayır. 

Proqram çərçivəsində iştirakçılara bir sıra mühüm imkanlar təqdim olunur. Startaplar qlobal ekosistemin peşəkar mütəxəssislərindən mentorluq, "Startap Şəhadətnaməsi", patentləşdirmə proseslərində dəstək, yerli və qlobal startaplarla şəbəkələşmək, beynəlxalq innovasiya ekosisteminə inteqrasiya olunmaq, eləcə də yerli və xarici investisiya imkanları əldə edəcəklər.

Qeydiyyat müddəti:1 avqust 2025-ci il tarixinə qədər davam edir.

Qeydiyyat linki: https://forms.gle/YwzgE1aXizJ6Km2e9