İqtisadi İslahatların Təhlili və Kommunikasiya Mərkəzinin operatoru olduğu "Enterprise Azerbaijan" portalının təşkilatçılığı ilə "Startup School 3" layihəsinin növbəti infosessiyası Bakı Dövlət Universitetində baş tutub.

Tədbirdə universitetin tələbələri, gənc startapçılar və innovasiya sahəsinə maraq göstərən digər iştirakçılar fəal iştirak ediblər. İnfosessiyanın məqsədi tələbələrə və startap həvəskarlarına layihənin təqdim edilməsi, iştirak imkanlarının izah olunması və innovativ təşəbbüslərin dəstəklənməsi olub.

"Enterprise Azerbaijan" portalının rəhbəri İsa Qasımov layihə çərçivəsində icra olunan "Yaşıl və Rəqəmsal İpək Yolu" (Green and Digital Silk Road) beynəlxalq akselerasiya proqramı barədə ətraflı məlumat verib. O bildirib ki, proqramın əsas məqsədi yaşıl və rəqəmsal inkişaf sahələrində fəaliyyət göstərən startapları dəstəkləmək, innovasiya ekosistemində yeni təşəbbüslərə yol açmaq, regional əməkdaşlığı gücləndirmək və investisiya imkanlarını artırmaqdır.

İnteraktiv şəkildə keçirilən infosessiyada iştirakçılar proqramın məqsəd və vəzifələri, seçim meyarları, təlim və mentorluq mərhələləri, həmçinin yerli və beynəlxalq tərəfdaşlıq imkanları barədə geniş məlumat əldə ediblər. Sessiya çərçivəsində iştirakçıların sualları cavablandırılıb və startap inkişafı ilə bağlı praktiki məsləhətlər təqdim olunub.

Qeyd edək ki, "Startup School 3" layihəsi yerli və beynəlxalq innovasiya təşəbbüsləri ilə inteqrasiya olunaraq həyata keçirilir və Azərbaycanda startap ekosisteminin inkişafına töhfə vermək, gənc təşəbbüskarların potensialını gücləndirmək və onların qlobal bazara çıxış imkanlarını genişləndirmək məqsədi daşıyır.