Biznes mühiti və beynəlxalq reytinqlər üzrə Komissiyanın Kiçik və Orta Biznesin İnkişafı Agentliyinin (KOBİA) rəhbərlik etdiyi “Korporativ idarəetmə, investisiyalar və korporativ sosial məsuliyyət” işçi qrupunun növbəti iclası keçirilib.

Onlayn formatda təşkil olunmuş iclasda Azərbaycan Respublikası Prezidentinin Administrasiyasının, İqtisadiyyat, Ədliyyə, Ekologiya və Təbii Sərvətlər, Energetika, Rəqəmsal İnkişaf və Nəqliyyat nazirliklərinin, Mərkəzi Bankın, Dövlət Statistika Komitəsinin, Dövlət Neft Şirkətinin, Azərbaycan Standartlaşdırma İnstitutunun, İqtisadi Zonaların İnkişafı Agentliyinin, İnnovasiya və Rəqəmsal İnkişaf Agentliyinin, İqtisadi İslahatların Təhlili və Kommunikasiya Mərkəzinin, eləcə də bir sıra ictimai birliklərin və məsləhətçi şirkətlərin nümayəndələri iştirak ediblər.

Biznes mühiti və beynəlxalq reytinqlər üzrə Komissiyanın Katibliyinin rəhbəri, Azәrbaycan Respublikası Prezidentinin Administrasiyasının İqtisadi siyasәt vә sәnaye mәsәlәlәri şöbәsinin sektor müdiri Vüsal Şıxәliyev və “Korporativ idarəetmə, investisiyalar və korporativ sosial məsuliyyət” işçi qrupunun rəhbəri, KOBİA-nın İdarə Heyətinin sədri Orxan Məmmədov işçi qrupunun 2023-cü il üzrə Fəaliyyət Planının icrasına və qarşıdakı vəzifələrə, görülən tədbirlərin müvafiq reytinq hesabatlarında ölkəmizin qiymətləndirmə prosesində obyektiv dəyərləndirilməsinə öz töhfəsini verəcəyinə dair fikirlərini bölüşüblər.

İclasda işçi qrupunun 2023-cü il üçün Fəaliyyət Planının icrası sahəsində görülmüş işlər barədə hesabatı təqdim edilib, bu sahədə yeni çağırışlara dair müzakirələr aparılıb. Həmçinin, iclas zamanı müvafiq işçi qrup çərçivəsində yaradılmış Ekoloji, sosial və korporativ idarəetmə (ESG) standartları üzrə alt-qrupun fəaliyyətinə dair də məlumat verilib.

Qeyd edək ki, “Korporativ idarəetmə, investisiyalar və korporativ sosial məsuliyyət” işçi qrupunun 2023-cü il üzrə Fəaliyyət Planında Qlobal Rəqabətlilik Hesabatı, İqtisadi Azadlıq İndeksi və Qlobal İnnovasiya İndeksi olmaqla 3 mühüm reytinq qiymətləndirməsinə aid 48 tədbir qeyd olunub. Tədbirlərin icrasında 11 dövlət qurumu və təşkilatları iştirak edir.