Azərbaycanda ortamüddətli xərclər çərçivəsi potensialının gücləndirilməsi proqramı müzakirə edilib

26 yanvar 2023, 15:00

A+ A-

İqtisadi İslahatların Təhlili və Kommunikasiya Mərkəzinin (İİTKM) icraçı direktoru Vüsal Qasımlı İsveçrə İqtisadi Əməkdaşlıq Qurumu (SECO) tərəfindən dəstəklənən “Azərbaycanda Ortamüddətli Xərclər Çərçivəsi Potensialının Gücləndirilməsi Proqramı”nın həyata keçirilməsi ilə bağlı müzakirələr üçün ölkəmizdə səfərdə olan missiya heyətinin üzvlərini qəbul edib.

Görüş zamanı Vüsal Qasımlı “Azərbaycan Respublikasının 2022-2026-cı illərdə sosial-iqtisadi inkişaf strategiyasında” ortamüddətli xərclər çərçivəsinin tətbiqi üzrə nəzərdə tutulan tədbirlər və fiskal dayanıqlılığının təmin edilməsi istiqamətində qəbul edilən qanunlar və fiskal qaydalar barədə qonaqlara ətraflı məlumat verib. Eyni zamanda, proqram büdcənin tətbiqində monitorinq və qiymətləndirmənin rolu, İİTKM-in həyata keçirdiyi fəaliyyətlər və ümumilikdə ölkədə monitorinq və qiymətləndirmə institutunun təkmilləşdirilməsi üzrə görülən işlər barədə məqamları qonaqların diqqətinə çatdırıb.

Avropa və Mərkəzi Asiya regionu dövlət sektorunun baş mütəxəssisi, eyni zamanda tapşırıq qrupunun rəhbəri Andzs Ubelis Azərbaycanda qəbul olunan dövlət proqramlarının monitorinq və qiymətləndirmə hesabatlarının proqram büdcənin tətbiqi prosesi ilə əlaqələndirilməsi və ümumilikdə Ortamüddətli Xərclər Çərçivəsi sahəsində potensialın gücləndirilməsinin əhəmiyyəti barədə məlumat verib. Görüşdə dövlət maliyyə islahatları üzrə beynəlxalq məsləhətçi Mark Robinson, ortamüddətli xərclər çərçivəsi islahatları strategiyası üzrə məsləhətçi Marko Kanqiano, dövlət büdcəsi üzrə məsləhətçi Jordi Banos Roviranın iştirakı ilə Azərbaycanda Ortamüddətli Xərclər Çərçivəsinin tətbiqi ilə bağlı fikir mübadiləsi aparılıb.