İqtisadi İslahatların Təhlili və Kommunikasiya Mərkəzinin (İİTKM) operatoru olduğu Enterprise Azerbaijan portalının rəhbəri Mətanət Musayeva “Startup School” layihəsinin növbəti fəaliyyət planını müzakirə etmək üçün Türkiyənin Ankara şəhərində yerləşən OSTİM Texniki Universitetində olub.

Universitetdə Enterprise Azerbaijan və ABŞ-ın Nevada Universitetinin Özmən Sahibkarlıq Mərkəzinin birgə əməkdaşlığı çərçivəsində yaradılan “Startup School” layihəsinin növbəti mərhələdə fəaliyyətinə dair “yol xəritəsi”nin təsdiq olunması istiqamətində müzakirə aparılıb. Müzakirələrdə iştirak edən Enterprise Azərbaycan portalının rəhbəri Mətanət Musayeva və Özmen Sahibkarlıq Mərkəzinin direktoru Mehmet Serkan Tosun İİTKM, Nevada Universiteti və OSTİM Texniki Universiteti arasında gələcək əməkdaşlıqlar barədə fikir mübadiləsi aparıblar.

Səfər çərçivəsində qonaqlar həmçinin “Startup School” layihəsinin mentorlarından olan OSTİM Texniki Universitetinin nəzdində fəaliyyət göstərən OSTiMTECH Sahibkarlıq və Liderlik Mərkəzinin direktoru Melike Aktaş Bozkurt ilə bərabər OSTİM İdarə Heyətinin sədri Orhan Aydın ​​ilə görüşüblər. OSTİM haqqında məlumat verən Orhan Aydın Özmen Sahibkarlıq Mərkəzi və Enterprise Azerbaijan ilə əməkdaşlıq edilə biləcək sahələr haqqında da fikirlərini bölüşüb.

Daha sonra Mətanət Musayeva  OSTİM Texnoparkını, İNNO:14 Akselerasiya Mərkəzini və “ELMED Medical Systems” beynəlxalq şirkətini ziyarət edib, texnoparkın ümumi fəaliyyəti, İNNO:14 Akselerasiya Mərkəzinin məqsədi və hazırkı vəziyyəti ilə tanış olub. Qonaqlara OSTİM Texnoparkın gələcək hədəfləri və istehsal xətti haqqında məlumat verilib, gələcək əməkdaşlıqlar ətrafında müzakirə aparılıb.