İqtisadi İslahatların Təhlili və Kommunikasiya Mərkəzinin (İİTKM) operatoru olduğu “Azexport” portalı ilə beynəlxalq rəqəmsal ödəniş sistemi olan “Payoneer” arasında növbəti işgüzar görüş keçirilib. Onlayn görüşün əsas mövzusu qlobal elektron ticarət ekosistemində baş verən son texniki və hüquqi yeniliklər, eləcə də bu dəyişikliklərin yerli bazara inteqrasiyası olub.

Görüşdə beynəlxalq rəqəmsal ticarətdə yeni trendlər, o cümlədən "Amazon", "eBay", "Etsy" və "Alibaba" kimi nəhəng platformaların son dövrlərdə tətbiq etdiyi yenilənmiş hüquqi tənzimləmələr və innovativ texniki alətlər ətrafında fikir mübadiləsi aparılıb. “Azexport” portalının rəhbəri Ayxan Qədəşov bildirib ki, sahibkarlarımızın bu dəyişikliklərdən dərhal və doğru mənbədən xəbərdar olması həm biznesin fasiləsizliyi, həm də ölkəyə valyuta axınının stimullaşdırılması üçün vacibdir.

Bu məqsədlə “Azexport” portalı ilə “Payoneer” arasında məlumat mübadiləsi daha da intensivləşdirilir. Yeni ekosistem qaydalarına həsr olunmuş birgə vebinarların, həmçinin beynəlxalq platformalarda satıcılara dəstək xarakterli təlimatların hazırlanaraq ictimaiyyətə təqdim olunması nəzərdə tutulur.

"Azexport" və "Payoneer" arasında bundan əvvəl əldə olunmuş razılaşmalara əsasən, artıq Azərbaycan üzrə xüsusi nümayəndə təyin edilib və yerli istifadəçilər üçün problemlərin həllini sürətləndirən birbaşa rəqəmsal müraciət kanalı aktivləşdirilib.