İqtisadi İslahatların Təhlili və Kommunikasiya Mərkəzinin (İİTKM) “Azexport” portalı, Rəqəmsal İnkişaf və Nəqliyyat Nazirliyi və "Rəqəmsal logistika platforması" (DLP- Digital Logistics Platform) layihəsinin icraçı şirkətinin nümayəndələri arasında əməkdaşlıq imkanlarının genişləndirilməsi məqsədilə onlayn görüş keçirilib.

Görüşdə İİTKM-nin operatoru olduğu “Azexport” portalının sahibkarlar üçün təqdim etdiyi xidmətlər və bu xidmətlərin qeyri-neft sektoru üzrə ixrac imkanlarının genişləndirilməsində rolu barədə məlumat verilib. Portalın rəhbəri Ayxan Qədəşov “Azexport” tərəfindən təqdim olunan sərbəst satış sertifikatı (Certificate of Free Sale) barədə təqdimatla çıxış edib. O bildirib ki, 2018-ci ildən etibarən 700-dən artıq adda məhsula bu sertifikat təqdim olunub. Sertifikatlar əsasən insan orqanizmi ilə təmasda olan tibbi avadanlıqlar, qida məhsulları və dərman vasitələrinin ixracı üçün verilib. Bu sənəd, xüsusən Körfəz, Asiya və Amerika ölkələri kimi strateji bazarlara çıxış imkanlarını artırmaqla, Azərbaycanın ixrac coğrafiyasını əhəmiyyətli dərəcədə genişləndirib.

Daha sonra “DLP” layihəsinin icraçı şirkətinin nümayəndəsi layihə üzrə təqdimatla çıxış edib. Layihənin beynəlxalq ticarət zəncirində rəqəmsal texnologiyaların tətbiqini təşviq etməsi, e-logistika həlləri və proseslərin avtomatlaşdırılması imkanları barədə ətraflı məlumat verilib.

Tərəflər sərbəst satış sertifikatının “DLP” platformasına inteqrasiyası istiqamətində potensial əməkdaşlıq yollarını, texniki uyğunluq məsələlərini və rəqəmsal sistemlərin qarşılıqlı əlaqələndirilməsinin faydalarını müzakirə ediblər.